1Sa 13 | CopSahBible2

1 Samuel 13

1 2 ⲁⲩⲱ ⲥⲁⲟⲩⲗ ⲁϥⲥⲱⲧⲡ ⲛⲁϥ ⲙⲙⲁⲁⲃ ⲛϣⲉ ⲛⲣⲱⲙⲉ ⲉⲃⲟⲗ ϩⲛ ⲛⲣⲱⲙⲉ ⲙⲡⲓ︤ⲏ︦ⲗ︥ ϫⲟⲩⲱⲧ ⲇⲉ ⲛϣⲉ ⲛⲣⲱⲙⲉ ⲛⲉⲩⲟⲩⲏϩ ⲛⲥⲁ ⲥⲁⲟⲩⲗ ϩⲙ ⲙⲁⲭⲉⲙⲁⲥ ⲁⲩⲱ ϩⲙ ⲡⲧⲟⲟⲩ ⲛⲃⲁⲓⲑⲏⲗ ⲁⲩⲱ ⲙⲏⲧ ⲛϣⲉ ⲛⲣⲱⲙⲉ ⲛⲉⲩϣⲟⲟⲡ ⲙⲛ ⲓⲱⲛⲁⲑⲁⲛ ϩⲛ ⲅⲁⲃⲁⲁ ⲛⲃⲉⲛⲓⲁⲙⲓⲛ ⲡⲕⲉϣⲱϫⲡ ⲇⲉ ⲙⲡⲗⲁⲟⲥ ⲁϥϫⲟⲟⲩⲥⲟⲩ ⲉϩⲣⲁⲓ ⲡⲟⲩⲁ ⲡⲟⲩⲁ ⲉⲡⲉϥⲙⲁ ⲛϣⲱⲡⲉ 3 ⲓⲱⲛⲁⲑⲁⲛ ⲇⲉ ⲁϥⲡⲁⲧⲁⲥⲥⲉ ⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲡⲉⲧⲟⲩⲏϩ ϩⲙ ⲡⲃⲟⲩⲛⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲧⲙ ⲥⲁⲟⲩⲗ ⲇⲉ ⲁϥⲥⲁⲗⲡⲓⲍⲉ ⲛⲟⲩⲥⲁⲗⲡⲓⲅⲝ ⲉⲃⲟⲗ ϩⲙ ⲡⲕⲁϩ ⲧⲏⲣϥ ⲉϥϫⲱ ⲙⲙⲟⲥ ϫⲉ ⲛϩⲙϩⲁⲗ ⲁⲩⲁⲑⲉⲧⲉⲓ ⲁⲩϥⲓ ϫⲱⲟⲩ 4 ⲁⲩⲱ ⲡⲓ︤ⲏ︦ⲗ︥ ⲧⲏⲣϥ ⲁⲩⲥⲱⲧⲙ ϫⲉ ⲥⲁⲟⲩⲗ ⲁϥⲡⲁⲧⲁⲥⲥⲉ ⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲁϥⲃⲟⲧϥ ⲉⲃⲟⲗ ⲁⲩⲱ ⲁⲩϯϣⲓⲡⲉ ⲛⲛⲁⲗⲗⲟⲫⲩⲗⲟⲥ ⲡⲗⲁⲟⲥ ⲇⲉ ⲁϥⲱϣ ⲉⲃⲟⲗ ⲉⲧⲣⲉⲩⲟⲩⲁϩⲟⲩ ⲛⲥⲁ ⲥⲁⲟⲩⲗ ϩⲛ ⲅⲁⲗⲅⲁⲗⲁ 5 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲉⲩⲡⲟⲗⲉⲙⲟⲥ ⲉⲙⲓϣⲉ ⲙⲛ ⲡⲓ︤ⲏ︦ⲗ︥ ⲁⲩⲧⲱⲟⲩⲛ ⲁⲩⲃⲱⲕ ⲉⲣⲱϥ ⲙⲡⲓ︤ⲏ︦ⲗ︥ ⲛϭⲓ ϣⲟⲙⲛⲧ ⲛⲧⲃⲁ ⲛϩⲁⲣⲙⲁ ⲁⲩⲱ ⲥⲟⲟⲩ ⲛϣⲟ ⲛϩⲓⲡⲡⲉⲩⲥ ⲁⲩⲱ ⲡⲉⲩⲗⲁⲟⲥ ⲉϥⲟ ⲛⲑⲉ ⲙⲡϣⲱ ⲛⲑⲁⲗⲁⲥⲥⲁ ϩⲛ ⲧⲉϥⲁϣⲏ ⲁⲩⲉⲓ ⲁⲩⲧⲁⲁⲩ ⲉϩⲣⲁⲓ ⲉⲙⲁⲭⲉⲙⲁⲥ ⲙⲡⲉⲙⲧⲟ ⲉⲃⲟⲗ ⲛⲃⲁⲓⲑⲱⲛ ⲙⲡⲉϥⲣⲏⲥ 6 ⲁⲩⲱ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩⲛⲁⲩ ϫⲉ ⲛⲥⲉⲛⲁⲉϣϭⲙϭⲟⲙ ⲁⲛ ⲉⲁϩⲉⲣⲁⲧⲟⲩ ⲉⲣⲟⲟⲩ ⲡⲗⲁⲟⲥ ⲙⲡⲓ︤ⲏ︦ⲗ︥ ⲁⲩϩⲟⲡⲟⲩ ϩⲛ ⲙϩⲁⲁⲩ ⲁⲩⲱ ϩⲛ ⲛⲉⲃⲏⲃ ⲁⲩⲱ ϩⲛ ⲛⲉϩⲓⲉⲓⲧ ⲙⲛ ⲛⲉϣⲏⲓ 7 ⲛⲉⲧⲛⲁⲡⲱⲧ ⲇⲉ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁⲩⲃⲱⲕ ⲉϩⲣⲁⲓ ⲉⲡⲕⲁϩ ⲛⲅⲁⲇ ⲙⲛ ⲅⲁⲗⲁⲁⲇ ⲥⲁⲟⲩⲗ ⲇⲉ ⲉⲧⲓ ⲛⲉϥϩⲛⲅⲁⲗⲅⲁⲗⲁ ⲡⲗⲁⲟⲥ ⲧⲏⲣϥ ⲉⲧⲟⲩⲏϩ ⲛⲥⲱϥ ⲁⲩϣⲧⲟⲣⲧⲣ 8 ⲁⲩⲱ ⲡⲥⲁϣϥ ⲛϩⲟⲟⲩ ⲁⲩⲟⲩⲱ ⲛⲧⲙⲛⲧⲙⲛⲧⲣⲉ ⲛⲑⲉ ⲛⲧⲁⲥⲁⲙⲟⲩⲏⲗ ϫⲟⲟⲥ ⲛⲁϥ 9 ⲡⲉϫⲉⲥⲁⲟⲩⲗ ϫⲉ ⲁⲩⲉⲓⲥ ⲛⲧⲁⲧⲁⲗⲟ ⲉϩⲣⲁⲓ ⲛⲛⲉϭⲗⲓⲗ ⲙⲛ ⲛⲉⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲁⲩⲱ ⲥⲁⲟⲩⲗ ⲁϥⲧⲁⲗⲟ ⲉϩⲣⲁⲓ ⲙⲡϩⲟⲗⲟⲕⲁⲩⲧⲱⲙⲁ 10 ⲛⲧⲉⲣⲉϥⲟⲩⲱ ⲇⲉ ⲉϥⲧⲁⲗⲟ ⲉϩⲣⲁⲓ ⲙⲡϩⲟⲗⲟⲕⲁⲩⲧⲱⲙⲁ ⲥⲁⲙⲟⲩⲏⲗ ⲁϥⲉⲓ ⲁⲩⲱ ⲥⲁⲟⲩⲗ ⲁϥⲉⲓ ⲉⲃⲟⲗ ϩⲏⲧϥ ⲉⲧⲣⲉϥⲥⲙⲟⲩ ⲉⲣⲟϥ 11 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉ ⲛⲧⲁⲕⲣⲟⲩ ⲡⲉϫⲉⲥⲁⲟⲩⲗ ϫⲉ ⲉⲃⲟⲗ ϫⲉ ⲁⲓⲛⲁⲩ ϫⲉ ⲡⲗⲁⲟⲥ ⲁϥⲃⲱⲕ ⲁϥⲕⲁⲁⲧ ⲁⲩⲱ ⲛⲧⲟⲕ ⲙⲡⲉⲕⲉⲓ ⲛⲁⲓ ⲕⲁⲧⲁ ⲡⲧⲱϣ ⲛⲛⲉϩⲟⲟⲩ ⲛⲑⲉ ⲛⲧⲁⲕⲣⲙⲛⲧⲣⲉ ⲛⲁⲓ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉⲙⲁⲭⲉⲙⲁⲥ 12 ⲁⲓϫⲟⲟⲥ ϫⲉ ⲧⲉⲛⲟⲩ ⲛⲁⲗⲗⲟⲫⲩⲗⲟⲥ ⲛⲁⲉⲓ ⲛⲁⲓ ⲉϩⲣⲁⲓ ⲉⲅⲁⲗⲅⲁⲗⲁ ⲉⲙⲡⲓⲧⲉⲃϩⲡϩⲟ ⲙⲡϫⲟⲉⲓⲥ ⲁⲓⲉⲅⲕⲣⲁⲧⲉⲩⲉ ⲙⲙⲟⲓ ⲁⲓⲧⲁⲗⲟ ⲛⲛⲉϭⲗⲓⲗ ⲉϩⲣⲁⲓ 13 ⲡⲉϫⲉⲥⲁⲙⲟⲩⲏⲗ ⲇⲉ ⲉϩⲟⲩⲛ ϩⲛ ⲥⲁⲟⲩⲗ ϫⲉ ⲙⲡⲉⲕϯϩⲏⲩ ⲉⲃⲟⲗ ϫⲉ ⲙⲡⲉⲕϩⲁⲣⲉϩ ⲉⲧⲁⲉⲛⲧⲟⲗⲏ ⲛⲧⲁⲡϫⲟⲉⲓⲥ ϩⲱⲛ ⲙⲙⲟⲥ ⲉⲧⲟⲟⲧⲕ ⲁⲩⲱ ⲧⲉⲛⲟⲩ ⲛⲑⲉ ⲛⲧⲁⲡϫⲟⲉⲓⲥ ⲥⲃⲧⲉⲧⲉⲕⲙⲛⲧⲣⲣⲟ ⲉⲧⲣⲉⲥϣⲱⲡⲉ ⲛⲁⲕ ϣⲁⲃⲟⲗ ⲉϫⲙ ⲡⲓ︤ⲏ︦ⲗ︥ 14 ⲧⲉⲛⲟⲩ ϭⲉ ⲧⲉⲕⲙⲛⲧⲣⲣⲟ ⲛⲥⲛⲁⲁϩⲉⲣⲁⲧⲥ ⲁⲛ ⲁⲩⲱ ⲡϫⲟⲉⲓⲥ ⲛⲁⲕⲱⲧⲉ ⲛⲁϥ ⲛⲥⲁ ⲟⲩⲣⲱⲙⲉ ⲕⲁⲧⲁ ⲡⲉϥϩⲏⲧ ⲛⲧⲉⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲉⲧⲣⲉϥⲣⲁⲣⲭⲱⲛ ⲉϫⲙ ⲡⲉϥⲗⲁⲟⲥ ⲉⲃⲟⲗ ϫⲉ ⲙⲡⲉⲕϩⲁⲣⲉϩ ⲉⲛⲉⲛⲧⲟⲗⲏ ⲛⲧⲁⲡϫⲟⲉⲓⲥ ϩⲱⲛ ⲙⲙⲟⲟⲩ ⲉⲧⲟⲟⲧⲕ 15 ⲁⲩⲱ ⲥⲁⲙⲟⲩⲏⲗ ⲁϥⲧⲱⲟⲩⲛ ⲁϥⲙⲟⲟϣⲉ ⲉⲃⲟⲗ ϩⲛ ⲅⲁⲗⲅⲁⲗⲁ ⲉϩⲣⲁⲓ ⲉⲧⲉϥϩⲓⲏ ⲡϣⲱϫⲡ ⲇⲉ ⲙⲡⲗⲁⲟⲥ ⲁⲩⲉⲓ ⲉϩⲣⲁⲓ ⲉⲩⲟⲩⲏϩ ⲛⲥⲁ ⲥⲁⲟⲩⲗ ⲉⲧⲣⲉⲩⲁⲡⲁⲛⲧⲁ ⲉⲡⲉⲩⲗⲁⲟⲥ ⲛⲣⲉϥⲡⲟⲗⲩⲙⲉⲓ ⲉⲁⲩⲉⲓ ⲉⲃⲟⲗ ϩⲛ ⲅⲁⲗⲅⲁⲗⲁ ⲉϩⲣⲁⲓ ⲉⲅⲁⲃⲁⲁ ⲡⲕⲁϩ ⲛⲃⲉⲛⲓⲁⲙⲓⲛ ⲁⲩⲱ ⲥⲁⲟⲩⲗ ⲁϥϭⲉⲙⲡϣⲓⲛⲉ ⲙⲡⲗⲁⲟⲥ ⲛⲧⲁⲩϩⲉ ⲉⲣⲟϥ ⲛⲙⲙⲁϥ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ 16 ⲥⲁⲟⲩⲗ ⲇⲉ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲡⲗⲁⲟⲥ ⲛⲧⲁⲩϩⲉ ⲉⲣⲟϥ ⲛⲙⲙⲁⲩ ⲁⲩϩⲙⲟⲟⲥ ϩⲛ ⲅⲁⲃⲁⲁ ⲡⲕⲁϩ ⲛⲃⲉⲛⲓⲁⲙⲓⲛ ⲁⲩⲣⲓⲙⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲙⲁⲭⲉⲙⲁⲥ 17 ⲛⲣⲉϥⲧⲁⲕⲟ ⲁⲩⲉⲓ ⲉⲃⲟⲗ ϩⲛ ⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲉⲩⲛⲁⲣϣⲟⲙⲛⲧ ⲛⲉⲙⲗⲁϩ ⲡⲟⲩⲁ ⲛⲛⲉⲙⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲅⲟⲫⲉⲣⲁ ⲉϫⲙ ⲡⲕⲁϩ ⲛⲥⲱⲅⲁⲗ 18 ⲁⲩⲱ ⲡⲕⲉⲉⲙⲡⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲃⲁⲓⲑⲱⲣⲱⲛ ⲁⲩⲱ ⲡⲕⲉⲉⲙⲡⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲅⲁⲃⲁⲁ ⲧⲉⲧⲛⲟⲩϫⲉ ⲉϩⲣⲁⲓ ⲉⲅⲁⲓ ⲛⲧⲉ ⲥⲁⲙⲓⲛ 19 ⲙⲡⲟⲩϩⲉ ⲇⲉ ⲉϩⲁⲙⲕⲏⲗⲗⲉ ⲙⲡⲉⲛⲓⲡⲉ ϩⲙ ⲡⲕⲁϩ ⲧⲏⲣϥ ⲙⲡⲓ︤ⲏ︦ⲗ︥ ⲉⲧⲃⲉ ⲡⲁⲓ ⲛⲁⲗⲗⲟⲫⲩⲗⲟⲥ ⲁⲩϫⲟⲟⲥ ϫⲉ ⲛⲥⲉⲛⲁⲧⲁⲙⲓⲉⲥⲏϥⲉ ⲁⲛ ⲛϭⲓ ⲛϩⲉⲃⲣⲁⲓⲟⲥ ϩⲓ ⲙⲉⲣⲉϩ 20 ⲁⲩⲱ ⲡⲓ︤ⲏ︦ⲗ︥ ⲧⲏⲣϥ ⲛⲉⲩⲛⲏⲩ ⲉϩⲣⲁⲓ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲉⲧⲣⲉⲡⲟⲩⲁ ⲡⲟⲩⲁ ⲱⲧϩ ⲙⲡⲉϥⲟϩⲥ ⲁⲩⲱ ⲡⲟⲩⲁ ⲡⲟⲩⲁ ⲉⲧⲣⲉϥⲱⲧϩ ⲙⲡⲉϥⲕⲉⲗⲉⲃⲓⲛ ⲙⲛ ⲧⲉϥϩⲉⲗⲕⲟⲩ ⲙⲛ ⲡⲉϥⲥⲟⲧⲃⲉϥ ⲛⲣϩⲱⲃ 21 ⲡϫⲱⲱⲗⲉ ⲇⲉ ⲏ ⲡⲱϩⲥ ⲛⲉⲁϥⲉⲓ ⲉⲃⲟⲗ ⲉⲟϩⲥϥ ⲛⲉⲩⲥⲕⲉⲩⲏ ⲇⲉ ⲛⲉⲣⲉⲧⲟⲃϩⲉ ⲛⲁⲣϣⲟⲙⲧⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲁⲩⲱ ⲡⲕⲉⲗⲉⲃⲓⲛ ⲙⲛ ⲡⲟϩⲥ ⲡⲉⲓϣⲓ ⲛⲟⲩⲱⲧ ⲙⲙⲟⲟⲩ ⲡⲉ 22 ⲁⲥϣⲱⲡⲉ ⲇⲉ ϩⲛ ⲛⲉϩⲟⲟⲩ ⲙⲡⲡⲟⲗⲉⲙⲟⲥ ⲙⲙⲁⲭⲉⲙⲁⲥ ⲙⲡⲟⲩϩⲉ ⲉⲥⲏϥⲉ ϩⲓ ⲙⲉⲣⲉϩ ⲛⲧⲟⲟⲧϥ ⲙⲡⲗⲁⲟⲥ ⲧⲏⲣϥ ⲉⲧⲙⲟⲟϣⲉ ⲙⲛ ⲥⲁⲟⲩⲗ ⲁⲩⲱ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩϭⲓⲛⲉ ⲇⲉ ⲛⲧⲉ ⲥⲁⲟⲩⲗ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ 23 ⲓⲱⲛⲁⲑⲁⲛ ⲇⲉ ⲁϥⲉⲓ ⲉⲃⲟⲗ ϩⲙ ⲡⲙⲏⲏϣⲉ ⲛⲛⲁⲗⲗⲟⲫⲩⲗⲟⲥ ϩⲙ ⲡⲉⲕⲣⲟ ⲙⲙⲁⲭⲉⲙⲁⲥ ⲙⲡⲉϥⲧⲁⲙⲉⲡⲉϥⲉⲓⲱⲧ